城中鏡：聖誕盛饌

唔少家庭平日煲湯都會剩低大堆湯渣，琳琳就教大家用湯渣入面嘅豬肉，加啲煎香咗嘅蒜、乾葱同橄欖油，逐步加入蛋黃醬攪拌，以鹽同胡椒粉調味，再放喺多士上，瞬間變成法式聖誕派對小食。齊惜福之友榮譽委員吳蕙英同委員廖宇軒好感興趣，齊齊詢問烹調方法。

開法國餐廳嘅香港中華廠商聯合會（廠商會）常務會董黃家和，話自己間餐廳最常見嘅廚餘之一係蘿蔔頭，棄之可惜，不過用嚟煲湯好香㗎。咦！咁啲食材煲完湯，湯渣又可以再用，諗落變得好抵食。

羅台秦煮西餐省食材

同場嘅廠商會副會長戴澤良同太太羅台秦（Louisa）都有環保惜食貼士，當年因讀書同工作喺外國居住過十幾年嘅Louisa話，一個人住嗰時，如果唔想煮太多而要食隔夜飯，可以選擇煮西餐，例如意粉，因為一人分量嘅西餐材料比中餐少。而有時周末宴請朋友，佢就會煮招牌菜八寶鴨。

鄭錦富就教大家用菜葉同雞肉切碎撈勻煎成菜葉雞蓉餅，齊惜福之友榮譽委員區海倫同委員王詩雅都好欣賞，話用料同做法夠晒平民，好實用。