政壇：冤家瞌眼瞓 雷軍（目及）到實
有話同行如敵國，內地手機行業都有唔少呢類例子。浙江烏鎮正在舉行嘅第二屆世界互聯網大會，尋日係最後一天會議，不過，小米董事長雷軍同奇虎360董事長兼CEO周鴻禕又鬧出小話題。
雷軍眼甘甘望住同周公傾偈嘅周鴻禕，張相迅即喺內地網絡流傳。（互聯網圖片）
昨日重要講題係「萬物互聯驅動產業變革」，周鴻禕負責發表「萬物互聯，如何把好安全門」嘅主題演講。不過，周嘅發言啱啱開始，就先對自己早前喺會場瞓着覺道個歉先，笑言：「一覺醒來，世界就變了。」咩變呢？
原來，周鴻禕之前瞓着覺時畀人影咗相，相中仲見坐喺佢隔籬嘅雷軍眼甘甘望住周。大家都知，近日呢兩個冤家經常因為手機性能同銷售手法隔空互罵，難怪有內媒記者即時推測周總會唔會因為雷軍坐正隔籬，為免大家尷尬，即時扮瞓覺。
實情究竟係點呢？得佢兩個先至知，而周就喺自己微博上發貼，話真係一覺醒來，唔知點解佢瞓着覺呢張相會傳遍整個朋友圈！
