政壇：四點鐘許sir過檔 展大俠接棒
「四點鐘許Sir」許鎮德尋日正式告別警察公共關係科（PPRB），由有組織罪案及三合會調查科（俗稱O記）總警司區展秋接棒。許Sir因去年歷時七十九日的佔領行動期間，每日喺下晝四點主持記者會而聲名大噪，但佢話最難忘嘅唔係處理佔領行動，而係啟晴邨開槍案同平安夜執錢案喎！
許鎮德（左）及區展秋齊齊沖奶茶寓意交棒。
許Sir下月七日將調往深水埗警區做指揮官，尋日佢同接任嘅區Sir搞咗個別開生面嘅交接儀式，就係沖奶茶畀傳媒飲，寓意將PPRB過往優良嘅傳統，以及與傳媒同公眾保持嘅良好關係延續落去。
區Sir大名展秋與展昭嘅讀音接近，所以人稱「展大俠」，佢出身自警察世家，父親都係警務人員。修讀犯罪學嘅佢，一九八七年加入警隊，同已故無味神探陳思祺係同期同班，佢大部分時間駐守刑偵部門，屢破大案立功。一三年駐守新界南總區重案組時，就曾偵破全港最大淫網，區Sir當年出動飛虎隊破窗入屋，大舉拘捕三十幾人，檢獲嘅三百萬元現金塞滿晒成個夾萬。去年區Sir調往港島總區刑事部，同樣要處理佔領行動，幾乎晚晚喺警署瞓覺，之後調去O記負責佔領行動嘅檢控工作。
