香港大學近年爭議事件不斷，學生激進嘅行為惹來唔少批評，港大校長馬斐森前日喺港大校董會發言時都承認，港大排名近年下跌咗，甚至被科技大學爬頭，除咗受到計算排名方法改變嘅影響外，佢都列舉一系列事件，指摘港大中人太過着重邊個做校委會主席。馬斐森嘅言論雖然係警醒學生同校友，但佢自己都要為校長一職交功課，見住港大排名係咁插水，佢都一樣勢危！

批太着重誰掌校委

馬斐森列舉四年前國務院總理李克強到訪港大時，發生學生示威嘅八一八事件亦影響港大聲譽；近排港大校務委員會風波不斷，由示威者衝擊會議、禁錮校委到主席一職懸空至今，都惹來各界關注同擔心。馬斐森話，未知最近發生嘅事會唔會影響排名，佢亦批評現時大家太着重邊個做校委會主席，各界應該放下分歧，團結協助港大發展。

馬斐森嘅發言雖然有講明原因，但就畀人戴頭盔嘅感覺，作為港大校長，喺咁大外在壓力同阻力下，馬斐森又有冇承擔做校長嘅責任，平息紛爭、維護港大百年校譽呢？佢聲稱已經有詳細計劃幫助港大向前走喎！

第一手消息請下載on.cc東網iPhone/iPad/Android/Windows Phone Apps