政壇：立會內外不安 玩殘陳維安
立法會近日會內會外好多事，會內有大會恢復二讀版權修訂條例，建制同泛民角力不斷，點人鐘聲響個不停；會外則係大樓相繼有垃圾桶爆炸、又有疑似糞便，尋日連大樓加建工程中嘅一個玻璃上蓋都出現傾斜，爆出巨響，嚇到地盤要急急圍封，秘書長陳維安都拉隊去現場視察。議會咁多事，秘書處既要忙會內、又要顧會外，唔怪得陳維安尋日現身都謝謝哋咁款。
立會大樓玻璃上蓋出現裂縫（圓圖）。
疑支架出問題
立法會大樓外正進行加建工程，尋日朝早十點幾，近議員入口（二）側門同兒童畫廊之間嘅地盤內，一個離地五米高嘅玻璃上蓋突然發現有傾斜，仲發出巨響，上蓋與大樓牆身接口位置更出現裂縫，工人紛紛閃避，警方及消防接報到場後立即封鎖危險範圍，幸好沒有人受傷。
雖然建築署人員認為大樓結構唔會受影響，又否認事件涉及「豆腐渣」工程，但結構工程師兼大埔區議員劉志成就懷疑，工程嘅臨時支架或焊接位出咗問題，例如支架幼、數目太少，都可能造成承托力不足等現象。點都好，呢件事又有排調查、研究同補鑊。
雖然話聖誕假期已來臨，立法會議員有十多日假期，但唔少職員及秘書處人員仲有大把手尾跟，以秘書處人員為例，早前示威區有垃圾桶爆炸，雖然調查工作係警方負責，但秘書處要立即檢討保安工作。加上早前又有議員座位驚現疑似糞便（事後證實應為木工用嘅樹脂類物體），秘書處跟進化驗工作之外，又要忙於追緝出入有關會議室嘅人，同防範類似惡心事件真係殺入議會。
依家大樓外嘅建築工程又出問題，秘書處勢又要跟進多一單出入安全嘅問題，議會咁多事，陳維安真係成頭煙都唔掂。
