SUN揭秘：果欄老闆 呃Like行善
近日網上流傳一張圖，只要令發布網頁的果欄水果店獲得五萬個Like，就會送水果，做善事。一般人不禁要問，五萬個Like，背後商機無限，本小利大，難怪眾多網民只會認為老闆博宣傳，是否做善事還是其次。
馮智聰坦言，若下次做善事，會更謹慎考慮用不同形式。
馮智聰自言老闆也沒有優待，凡事都要落手落腳。
預先準備五十箱，共三千個奇異果，已悉數送予各慈善機構。
果欄推出貼文後，惹來網民熱烈討論。（互聯網圖片）
想出這條「絕世好橋」，正是年僅三十多歲的年輕老闆馮智聰，「其實只不過好小事，突然諗到咪去做，唔明點解當咗一件咁大嘅事嚟睇。」
位於油麻地新填地街與窩打老道交界的進濤菓欄，過去一直有捐錢給不同慈善機構，亦曾經以成本價或贊助形式支持一些團體活動，如慈善跑步賽。只是第一次選擇網上貼文，以送水果形式做善事，沒料到會引起這麼大回響。
「如果話無宣傳成分就係呃你，唔多唔少總會有，如果唔宣傳，就賺唔到錢，賺唔到，又點有錢嚟做善事，本身我只係想畀客知道，佢哋嚟買生果，有一部分係可以幫到人。」一個決定，惹來網民千言萬語，成為城中熱話，毀譽參半。
或用其他方式行善
「我自己都有睇過啲網民嘅留言，都有啲真係嚇親我，估唔到一件咁簡單嘅事都會變成咁。不過如果咁都介意，咁我乜嘢都會做唔到。」他不諱言，在香港做善事很難，很多時候別人會猜測你背後動機。「雖然網民嘅回應令我意想唔到，但我會一直去做善事，只係以後未必會再用呢種形式，可能變成純粹同行家分享。」
馮智聰這次送出五十箱、共六百包的彩虹奇異果，以每包五個計，數目合共三千個，受惠的包括關注露宿者、糖尿病及基層人士等。「我本身打算捐畀幫助小朋友嘅機構，覺得佢哋係最應該幫助嘅一群，不過後來有其他慈善機構搵我哋，我覺得只要有需要、有能力幫到嘅一定要幫，而且佢哋都會按住需要嚟拎，絕對唔會造成浪費。」
父親教誨 銘記於心
小時候已跟隨從事運輸的爸爸，在油麻地果欄裏打滾的馮智聰，進進出出，見盡各種人生百態，豐富了自己的閱歷。坦言爸爸從小教導的一件事，他不會忘記，亦未敢忘記，今天仍然銘記在心。「我阿爸同我講，人係需要互相幫助嘅，既然自己依家有能力，點解唔去幫人，有時每樣嘢，毋須要諗到咁盡。」
香港人行事謹慎，每件事都需要經過多方評估，小心求證，才下定論。是否做善事還是其次，或者我們需要學的，是怎樣相信別人。
文：劉茂強
圖：崔祖佑
逢星期四見刊
