政壇：林毅夫籲港生 認史關社
日前公開大學舉行畢業禮兼頒授榮譽博士學位予四位傑出人士，包括獲頒榮譽文學博士學位嘅香港教育學院前任院長許美德，同埋獲頒榮譽社會科學博士嘅世界銀行前任高級副行長林毅夫。林毅夫認為香港學生近年多咗參與政治議題同活動，代表佢哋有夢想同關心社會，但認為年輕人要知道內地發展同香港息息相關，多了解歷史，清楚點樣先會對自己同香港最好。
林毅夫（左）同許美德均對香港年輕人嘅教育有獨特睇法。
至於年輕人表達意見嘅手法，林毅夫話唔想去批評過去嘅事，話「年輕人總是年輕人」，而香港、內地同台灣嘅學生身處嘅社會有分別，自然看法亦有所不同，唔想比較三地學生。
至於操一口流利粵語嘅許美德就話佢喺香港生活咗十七年，喺上海同北京亦分別工作同居住咗兩年，深深感受內地教育同香港教育上嘅唔同。對全港性系統評估（TSA）備受爭議，佢話香港教育受英國教育模式影響，比其他地方更着重學生入唔入到大學，而內地教育就同法國、德國或蘇聯較相似，佢認為香港可以融合中西兩方嘅教育模式，改變制度同時考慮傳統教育嘅好處。
