政壇：立會藏糞懸案 梁繼昌堅稱無踩屎
立法會枱底藏糞懸案，涉事「中招」嘅會計界議員梁繼昌當日着嘅恤衫同牛仔褲管都中招，有議員事後質疑梁可能喺街上踩到糞便，梁繼昌尋日出席立會大會時再次憶述事件始末，指自己當日駕車到立會，形容係「堅離地」，笑言除非立會走廊有好多糞便，堅稱自己無踩到糞便，即使踩到糞便亦無可能蹺腳掂到，底因係自身柔軟度不足。
梁繼昌當日展示「中招」嘅位置。（資料圖片）
梁繼昌續指，當日發現「中招」時，其實自己嘅手亦沾有不明物體，隨即用酒精抹乾淨，佢笑稱早知留低唔抹走當證據，而立會職員知悉事件後亦以火酒清潔枱底，因此預料需要時間予有關方面培植細菌。
佢其後談及「中招」嘅牛仔褲，指事隔多日至今仲未取回，又忽發奇想指有意到購買牛仔褲嘅商舖，希望只剪走「中招」嘅褲管部分，改頭換面就可繼續着，暫無意棄掉。
