白鴿黨激進「乳鴿」中西區區議員「峯鴿」許智峯,舊年佔領區議會被保安一「抬」成名,最終要守行為一年,未知係咪擔心再發動佔領行動會再惹官非,尋日朝早佢同黨友兼同區候任區議員吳兆康行動時,就以垃圾代替自己「佔領」食物環境衞生署中西區辦事處!

許智峯(右)同吳兆康(左)喺食環署辦公室外傾倒垃圾,但無被票控。(互聯網圖片)

峯鴿日前喺社交網站自白,稱主張「非暴力直接行動」理念同「斯文」抗爭,又自稱「不求鎂光燈」。但「中區孖寶」峯鴿同吳兆康尋日就喺社交網站貼文,稱中環、半山區餐廳酒吧夜間違法傾倒垃圾問題嚴重,影響該區衞生,二人凌晨到酒吧區執起部分垃圾,突擊直搗食環署位於上環市政大廈嘅辦事處抗議,逼署方「面對」問題。

不過,人人都知亂拋垃圾定額罰款千五元,呢對孖寶豈非知法犯法?吳兆康話佢哋不但未有被票控,更引述署方代表感謝佢哋嘅意見,承諾會設法解決蘇豪區垃圾堆積問題,方案包括派通宵巡邏隊巡邏。其實表達意見有好多方式,如果下下靠打橫嚟爭取,咁仲使開區議會嘅?

第一手消息請下載on.cc東網iPhone/iPad/Android/Windows Phone Apps