包括狄志遠同黃成智在內嘅多名白鴿黨前成員,另起爐灶成立嘅政黨新思維,雖然話要走「第三道路」,但大部分成員都係白鴿黨舊人,所以組黨至今仲未擺脫白鴿黨嘅影子。有傳狄志遠近月積極向新面孔招手,曾任仁濟醫院主席同新民黨副主席嘅鄭承隆係頭號對象。鄭承隆承認狄志遠好「有誠意」同佢洽談過,但話暫時未正式加入。有消息指,如果鄭承隆成功入黨,將會有約三十個新民黨現任或前任成員跟隨加入新思維,傳聞包括已退出新民黨嘅葵青區議員張慧晶同前中國小姐香港賽區冠軍趙哲妤等。

由於新思維打算未來傾向行選舉導向,有分量嘅政治人物係該黨主要目標,其中廠商會代表林大輝,屬建制派又敢於批評政府,聽聞亦係佢哋嘅洽談對象。但新思維始終係新政黨,所以大輝對於加入都有唔少顧慮。其實一連串嘅招兵行動,都係為咗選舉作好準備,之前表明會積極考慮派人出戰立會新界東補選,亦有傳係由黃成智出戰,為明年九月換屆選舉試票。

但新思維近日反而對新東補選大吹淡風,聲言擔心出選會被認為係向泛民「鎅票」,形象負面會破壞喺明年九月出選立會換屆選舉嘅最終目標。其實走中間路線或「第三道路」,早已被定性偏向建制派,如今仲邀請有建制派背景人士加入,更加「水洗唔清」,形象已經負面,點解擔心參加補選被視為向泛民「鎅票」呢?

第一手消息請下載on.cc東網iPhone/iPad/Android/Windows Phone Apps