政壇：阿Ann似高鐵監工
高鐵工程超支同延誤爭議停不了，各界都關注工程會否爛尾，質疑政府監察唔夠，適逢立法會人事編制小組委員會尋日開會，討論開設一個職位監察港鐵完成高鐵工程。立法會議員Ann蔣麗芸批評，高鐵工地工程緩慢，佢日日都會去望個工地，覺得好似停咗工咁。嘩，唔通阿Ann做埋路政署嗰份，走去監察高鐵工程？
阿Ann話佢住喺高鐵工地隔籬，每朝都會去睇吓個工地，覺得好似停咗工咁，佢耐唔耐又會影吓相，覺得張張相都一樣，好似冇乜人開工，質疑署方每月只落一次工地監察係咪足夠，要求當局將監督人員嘅辦事處搬到高鐵地盤，保證高鐵工程唔會延期，否則唔投贊成票。
呢個講法隨即畀各方質疑，委員會主席葉劉淑儀就問，局方係咪同意有關工作人員搬到蔣麗芸樓下，之後路政署署長劉家強話，負責監督嘅專責小組要負責多個工地，包括米埔。阿Ann又再急急發言，指專責小組都可設喺米埔。劉家強就強調呢啲職員要做協調工作，放喺單一工地未必係最好嘅安排。講真，阿Ann已經日日監督高鐵工程，早就發現冇乜人做嘢啦，如果覺得監督人員多啲落工地係有用，點解唔早啲講呢？
拉布點人 壞鐘疑雲
此外，部分議員繼續「拉布」，不斷發言同要求響鐘點算法定人數，呢項議程已傾咗足足兩次會議，都仲未傾完。尋日開會半個鐘後，議員陳偉業要求點人數，會議室一個鐘響咗兩秒就冇響，連顯示秒數都停咗，一度被質疑個鐘係咪壞咗。據悉，其時有幾個委員會開緊，主席決定唔一定要響傳召鐘，於是響兩秒就停咗，但秘書處仲有一直計時。
