城中鏡：羅寶文揀男友要講feel
富豪酒店太子女Poman羅寶文、「玩具大王」蔡志明同太太尋晚出席公開活動，Poman透露聖誕節會留港同家人共度，又坦言仍係單身，佢笑言：「你哋都知我咁多年都冇拍拖，男性朋友極多，但男朋友就冇。我唔鍾意講條件，我講feel，緣分好多，但近年太多嘢做。」咁你唔心急？佢話：「冇得我急，乜都過晒，屋企人亦冇催我，可能唔講係唔想畀壓力我。」
羅寶文透露聖誕會留港同家人共度。
提到好友羅穎怡將結婚，Poman自爆原本擔任對方姊妹，但因工作太忙而叫對方另覓人選：「真係唔好意思，但我會去飲。」追問識唔識得羅穎怡嘅未來老公林知譽同埋覺得對方點樣？佢話：「識。佢幾靚仔，個人比較純。」提到之前林知譽曾與林芊妤發生殘廁gathering 事件，佢為對方講好話：「就係因為純先會發生呢件事，諗唔到對方……（意思係女方放料？）咁我唔知嘞！」
