政壇：楊偉雄預告快有人幫拖

立法會多個事務委員會尋日舉行聯席會議，楊偉雄回答議員提問時透露，副局同政助均由自己挑選，唔係特首梁振英揀畀佢，而且已經得到特首同意，依家正在「跑程序」，即係要查下人選嘅背景，形容呢啲都係一啲政府必要嘅程序，預計於一、兩周就會完成。

其實依家距離一五年結束只有半個月，唔知會否趕及年底公布，等踏入一六年就可以齊上齊落，分工合作去跟進九大工作重點呢？

另外，今次聯席會議仲出現一段小插曲，話說會議開到最後差唔多尾聲，楊偉雄嘅手機突然響起，佢第一時間講對不起（Sorry），手忙腳亂未成功關閉鈴聲之際，突然靈機一觸用右手手指點口水，再觸碰手機螢光幕。

此時幸好坐喺楊偉雄身邊嘅創科局常任秘書長卓永興即刻接波答問題頂住先，咁先令到個場面無咁尷尬。