政壇：胡志偉講枱底糞 食咖喱嗒落有味
上周三發生嘅立法會枱底藏糞事件仲未破到案，搞到一眾議員人心惶惶，但白鴿黨胡志偉尋日一邊食咖喱飯，一邊同記者分析案情同選情。期間佢仲話枱底下嘅未必係糞便，有機會係朱古力或者其他嘢，仲大談「屎味嘅朱古力」同「朱古力味嘅屎」，真係百無禁忌呀！
胡志偉食住咖喱講藏糞案，睇落仲相當滋味。
對於上周嘅白鴿黨黨員大會，建議明年立會選舉該黨可以喺新界東西各派兩隊出選，胡志偉覺得太過進取，認為該黨來年應採取「穩守突擊」策略，喺五大直選選區各一隊就夠，若成功保住兩個超級議席，合共七席已多過今屆。對於黨主席劉慧卿建議搞該黨初選辯論，胡志偉亦唔認同，擔心會畀人操控出現一啲奇怪結果，最後由並非最大機會當選嘅人出選。
胡志偉又話區選結果反映市民希望「去舊迎新」，因此支持三位現任副主席之一最年輕嘅羅健熙，接替將喺明年底卸任嘅卿姐做白鴿黨主席。
