政壇：立會外訪團又燒錢
過往不斷有批評立法會外訪係用公帑外遊，而現屆立會任期將於明年七月結束，啲事務委員會好似趕搭尾班車咁，繼發展事務委員會喺明年三月外訪新加坡之後，保安事務委員會亦都打算出訪澳洲，聲稱要考察當地嘅酷刑聲請機制喎。
睇番保安事務委員會提交嘅簡介文件，外訪嘅目的係研究澳洲處理免遣返聲請方面嘅經驗，仲有了解當地嘅戒毒康復中心、懲教機構同埋其他保安設施嘅運作。呢次外訪會喺明年三月下旬出發，去足七日，行程都好豐富，一共會去十個機構同埋設施訪問。外訪團會先去三日悉尼再去一日坎培拉，喺悉尼嘅三日行程包括澳洲紅十字會同埋澳洲人權委員會，而喺坎培拉就會去兩個機構，包括聯合國難民事務高級專員嘅辦事處。
之不過，呢次七日六夜外訪團預計最平都要每位二萬三千幾，但呢個價錢係坐經濟客位，如果要配合番一班尊貴議員嘅身份坐商務客位嘅話，團費就差唔多需要六萬蚊，係經濟客位價錢嘅兩倍。
落選隨時嘥心機
但係今屆立會剩番嘅任期已經唔多，加上保安事務委員會主席葉國謙下屆就收山唔選，其他委員有幾多可以成功連任，依家亦冇人講得準，如果佢哋豪花幾萬元公帑外訪後，隔幾個月就落選咗，咪嘥晒啲考察成果？意味着呢個外訪團隨時又係燒錢。
酷刑聲請機制近年有被濫用嘅現象，甚至被批評係浪費納稅人嘅錢。事關聲請人喺香港唔准工作，但係每月都會有房屋津貼同埋食物券。近年有唔少個案都係被揭發逾期居留同埋拒絕入境，有啲更加係先以探親為理由申請來港，到港後先申請酷刑聲請。公眾除咗質疑香港嘅酷刑聲請機制被濫用、燒緊納稅人嘅錢之外，係咪都要關注吓我哋班尊貴議員嘅燒錢行為呢？
