正當香港議事堂為咗一堆糞便而氹氹轉，喺地球另一端嘅法國巴黎，近二百個出席聯合國氣候大會嘅國家達成歷史性協議，承諾本世紀結束前將全球平均溫度升幅壓低到攝氏兩度以下。人哋關心全球局勢，香港政客就好似小學雞咁，傳出去真係笑大人個口！

可能有人會話，全球暖化係大圍事，點到香港理？嗱，呢鋪話法要戒嘞。今時今日地球村，一損俱損，一暖俱暖，啱啱過去嘅十一月係本港有紀錄以來最暖，天文台更預測今年會係香港以至全球史上最暖嘅一年。咪以為這個冬天不太冷，只係打邊爐唔夠過癮咁簡單呀，有專家估計，按照家陣氣溫上升速度，到咗本世紀末，地球海平面將會上升一點四公尺，到時馬爾代夫等國家將會消失，香港位處沿海，亦唔慌會有運行。

其實唔使講咁遠，全球暖化嘅影響就喺身邊。本港第一高峰大帽山係唔少物種嘅棲息地，可惜由於天氣愈來愈熱，部分原本喺低海拔生長活動嘅動植物被迫向高空發展，再咁落去，遲早絕種都似。

始終都係嗰句，拯救地球，人人有責。為減排訂立目標係全球大趨勢，連作為最大發展中國家嘅中國都承諾二○二○年前電力工業減排六成，反觀港府，表現認真羞家。環境局局長黃錦星日前出席巴黎氣候會議，淨係識唸口簧猛吹港府喺減排方面出咗幾多力，叫佢訂立實際目標就一味耍手擰頭。其實好多大城市已經有零排放時間表，香港冇理由唔同國際接軌啫，係咪？

講開又講，本港環保毫無寸進，減排減廢成效不彰，大家真係要「認住呢隻星」。有人質疑環境局廚餘減廢不力，佢老哥居然話係因為本地生產總值以及旅客增長。咁就好笑嘞，南韓經濟夠好咯，旅客夠多咯，但人哋政府強政勵治，早已推出按重量徵費嘅減廢政策，效果一樣好理想，唔好話港產官僚推卸責任，賴得就賴。

冇計喇，港府搞環保一向葉公好龍，講多過做。就以廚餘減廢為例，環保署曾邀請十二個政府部門簽署《惜食約章》，點知其中八個部門要到審計署審查先死死氣參與，食環署同房屋署呢兩個管理大量廚餘嘅部門更加死都唔肯簽。其身不正，何以正人？

如果話前朝曾蔭權爵士係氣候逃犯，咁現屆政府闊佬懶理、唔嗲唔吊，都係五十步笑百步嘅咋。叮！