城中鏡：行騷見「倩」心
前晚喺一個籌款晚宴中，見到好多名人嚟撐場，其中「恒生新抱」何倍倩就為咗籌款活動行騷，仲話自己成舊雲咁：「所以唔著咁高嘅高踭鞋。事前冇練習過，打天才波，臨急抱佛腳。」佢笑言唔會拍片，自己都唔想睇到自己。轉頭見到贊助服裝嘅Moiselle太子爺陳栢熹，佢笑言自己矮，所以唔會行騷。
何倍倩為慈善行騷，盡顯善心。
羅君兒（右）唔接受訪問，陳栢熹口快快話：「佢驚，未習慣」。
何超盈爆細佬猷君依家感情空白。
羅君兒現身晚宴「未習慣」
提到好友關之琳，陳栢熹透露嚟緊聖誕節，會約去食私房菜。問到關之琳係咪投入另一段感情？陳栢熹話：「睇報道佢話隨時ready，仲相信愛情。」咁聖誕節會唔會介紹男仔畀佢識？佢話：「唔使聖誕節。未搵到啱佢，佢咁高質素，唔敢亂嚟，佢講感覺嘅。」提到同佢一齊嚟嘅羅君兒唔受訪，佢就口快快話：「佢驚，係未習慣。佢啱啱有個系列出，放喺我舖頭度賣，有蠟燭，咕（口臣），嚟緊出書講旅遊，一月十三號有活動。」
賭王女兒何超盈以籌委身份出席籌款晚宴，佢話今年與往年唔同，有份籌辦，而且會行騷，希望籌多啲錢。佢話：「媽咪、細妹、細佬都會支持。至於一家人一齊行騷，就下年先。」提到細佬猷君現時喺美國讀書，係咪同新加坡組合By2嘅細孖Yumi白緯玲分手？超盈話佢就快返嚟，又話佢依家感情空白，都講咗好耐嘞！追問係咪支持細佬讀咗書先拍拖？佢話：「唔可以咁講，拍拖同讀書都可以兼顧，永遠都係讀書number one，唔會因感情而阻礙讀書，如果佢覺得影響到，無論乜嘢都唔應該繼續。佢唔會傷心，佢係男仔嚟，而且佢間學校世界排名第一，佢係叻仔嚟。」四太梁安琪啱啱喺法國回港，落機支持女兒超盈。再問到敢唔敢行騷？佢就笑言自己肥，怕撻低。
