政壇：KK唔言退 謀再選立會
喺今屆區議會選舉中，有多名年長資深議員落敗，當中包括民協嘅KK馮檢基，令佢冇得再循超級區議會界別角逐連任立法會。不過，現年已六十二歲嘅佢，尋日同記者茶敍時，仍拒絕言退，強調自己「不論健康、精神、意志都覺得政治生命未完，會搵個一擊即中嘅地區出擊，否則議會工作就會完！」
馮檢基（右）強調唔會重返九西直選，同譚國僑爭食。
KK稱唔食回頭草，重返九西「老巢」出選，以免同剛重新當選區議員嘅老戰友譚國僑爭食，當中以新西同九東機會較大，因民協喺嗰兩區有一定樁腳。民協計劃再戰超級議席，「民協現有十八位區議員，有入場券不去（選），交代唔到」，人選會喺三至四名中生代同新生代中挑選，而民協唔排除派多一人出戰地方直選，即一共最多派四人。
