政壇：梁繼昌身有屎 立會啡色恐怖
前日立法會發生「屎」上最恐怖嘅事，會計界議員梁繼昌開開吓會都「賴嘢」中糞，搞到一褲都係，令政界掀起一場「啡色恐怖」，人心惶惶。尋日喺馬場見到多名政界人士，大家都話一日未揪出元兇，以後坐低前要睇清睇楚。不過，亦有議員質疑今次「藏糞案」嘅元兇就係梁繼昌本人，唔通想話佢無端端自己「揦屎上身」？真係愈講愈恐怖，愈諗愈惡心！
張宇人（圖）估計梁繼昌其實係揩番自己踩到嘅屎。
曾偉雄同太太現身馬場，話事件可能係一種「反社會行為」。
鍾國斌謹慎 用鼻索清楚
飲食界張宇人分析，梁繼昌當日坐嗰個位，市民通常坐唔到，而秘書處職員都好高水準，相信唔係佢哋做，估計好可能係梁繼昌早已喺街上踩屎，之後蹺腳揩到會議室枱底，條牛仔褲再揩到枱底啲屎。佢仲笑言，如果梁繼昌姓周就知乜嘢事，因為「周身屎」！同場嘅前港大校委會主席梁智鴻話梁繼昌中嘅係乜，其實好易驗，佢認為事件唔係惡作劇，而係有人唔小心整到啫。
商界議員廖長江覺得事件相當懸疑，以後開會都「小心駛得萬年船」。紡織及製衣界議員鍾國斌就話開會前唔止會睇清楚，仲會用個鼻去索吓，「睇唔到都索到吖嘛」。
律政司司長袁國強亦話以後去立會開會坐低之前，都會望吓先，但相信「有第一次唔會咁快有第二次」。警務處前處長曾偉雄則形容事件雖然不涉暴力，但可能係一種「反社會行為」，呼籲各界小心，做任何嘢之前都要先諗清楚。
秘書處：或為外判工所為
有秘書處職員就認為，涉事會議室一般市民同記者都好難入到去，唔排除係立會嘅外判工所為，因為過往曾有外判工被發現有怪異行為，整污糟立會洗手間內部，「手法」同今次事故相似。
但由於會議室只會喺開會時開閉路電視，即使走廊外影到某人喺「案發」前入咗去，都好難證實係佢做，「隨時要驗DNA先查到」。睇嚟班議員有排驚嘞！
