喺泛民全力反對同拉布、建制派懶懶閒唔幫拖之下，俗稱「網絡23條」嘅《二○一四年版權（修訂）條例草案》形勢危殆，就連之前漫不經心、後知後覺嘅商務及經濟發展局局長Greg蘇錦樑，日前終於知驚取消外訪，留港救亡。但佢嘅上司、財爺「鬍鬚曾」曾俊華就仍然闊佬懶理喎。

版權草案原定上周三喺立法會恢復二讀，點知未開波已流會，押後至本周再戰。不過，建制派日前已明言，唔會編製更表防止再流會，但阿Greg尋日仍話唔會特別擔心，相信班議員會做工作喎，真係唔知佢係處變不驚，定係根本唔識反應。

只顧訪京 無意幫拖

一般情況而言，某件事超過某位局長嘅能力範圍，相關嘅司長就應該出手介入。就版權法同阿Greg而言，理應係鬍鬚曾出手嘅時候，但至今唔見佢有任何動作或幫拖嘅意圖。尋日佢仲有閒情寫網誌，講述訪京行程，亦只係掛住講「一帶一路」同霧霾，話「甫踏出機艙，立時感到京城嘅濃濃寒意，也察覺到霧霾下空氣中的微微焦味。」隻字未提喺香港就嚟燒燶晒嘅版權草案。

究竟鬍鬚曾返港後，聞唔聞到呢陣（火羅）味？泛民最近喺立會發動全方位拉布戰，大會、財委會、工務小組無一幸免，其中版權草案只要流多次會，就足以拖過年。聖誕、新年假完咗之後，就緊接有一月嘅施政報告、二月嘅農曆年假同預算案、三月嘅預算案特別財委會同北京人大政協兩會、到四月又有復活節假，真正開到立會大會嘅時間唔多，隨時未拖死版權草案就先拖死預算案，遲早都會燒到鬍鬚曾，再唔救火就好快一鑊熟！

第一手消息請下載on.cc東網iPhone/iPad/Android/Windows Phone Apps