政壇：社福界選立會鬥激
話時話，香港政治日趨激進化，而且沒有最激，只有更激，本來已經幾激嘅社福界亦唔例外。社會工作者註冊局日前進行改選，八個由社工直選產生嘅議席，全部由「小激」嘅香港社會工作者總工會（社總）同「大激」嘅社工復興運動代表贏得，當中得票最高嗰兩位，更加係出名「勁激」嘅「佔中死士」邵家臻，以及同曾涉向警員淋不知名液體嘅公文袋成員曾健超，而且兩人都話唔排除會參加來年嘅立法會社福界功能界別選舉。只屬「小激」嘅屬於工黨嘅現任社福界議員張國柱欲成功連任，估計有一定難度。
社工註冊局由十五名成員組成，包括一名社會福利署代表、六人由特首委任，另外八人由註冊社工選出。邵家臻同曾健超喺今次改選，分別取得三千四百多票同二千四百多票，比其他「小激」參選人多出成千多至二千票，多名被視為親建制或溫和派嘅參選人，更加只得幾百票而慘敗。
警告咪委任建制派
幾位當選人尋日會見記者，警告政府唔好委任啲輸咗嘅親建制人士入註冊局。咁來年會唔會參選立法會社福界，邵家臻就話言之尚早，又指代表社總嘅張國柱做得好好，除非對方主動交棒，否則應該無變動。曾健超就話「要選都唔會講」，否則要計選舉經費喎。至於張國柱本人，現年六十四歲、啱啱大病初愈嘅佢，自言仲有心有力，但最後會唔會角逐連任，就要等社總開會決定。究竟係咪上演一場「激」戰，大家拭目以待嘞！
另外，工黨尋日選出新一屆執委會成員，前執委胡穗珊獲逾六成團體同個人會員支持當選為新一任主席，副主席則由立會議員李卓人、郭永健同趙仕信三人出任。胡穗珊帶領黨友高叫「與時並進、迎難而上」口號，佢話連同自己在內嘅多位年輕中生代當選，感受到黨內支持新人，未來會爭取平權公義，鞏固工黨內部組織，吸納新血。對於明年立會選舉安排，佢重申工黨希望擴大版圖， 除現有議席外，希望爭取機會喺九龍東、西兩區出選，又話會盡快委任選舉事務委員會成員，主理選舉事務。
