好多人話政治污糟，真係冇講錯。立法會烏煙瘴氣，亂象叢生，爆粗掟嘢成為家常便飯，十足十鬥獸場，勢估唔到家陣仲離譜，連糞便都出埋，搞到議員一褲都係，唔止烏煙瘴氣，直情係烏煙臭氣，都唔知好笑定好嬲。

話說立法會帳目委員會尋日公開聆訊廚餘減量及循環再造，點知開開吓會突然有人慘叫一聲「有冇搞錯」，睇真啲，原來有議員中招，枱底發現疑似糞便。事後有關方面如臨大敵，除咗逐一清理其他議員座位，以防再出現類似「生化危機」，而且取走樣本作進一步化驗。

你話嘞，莊嚴嘅議事堂被糞便攻陷，成何體統吖？惡心仲係其次，保安漏洞先至大鑊。係人都知，立法會一向係無掩雞籠，唔單止人流複雜，部分議員更做埋「帶路黨」，裏應外合率領示威者衝擊立法會，有人甚至私運發電機進入大樓添。有議員擔心下次可能有人放刀片，其實，立法會中門大開，莫講話刀片，炸彈分分鐘都有之吖。

唔怪得立法會畀人叫「垃圾會」喇，部分政客不務正業，淨係識得搞政治，香港想有運行都幾難。好似港珠澳大橋咁吖，工程一拖再拖，造價一漲再漲，港府監管不力固然要負主要責任，反對派拖後腿同樣難辭其咎。工務小組尋日加會審議大橋追加五十四億元撥款，點知反對派議員唔止拉布，仲提出休會動議，結果又傾唔成，一拖一拖之下，超支肯定更加嚴重，到頭來咪又係納稅人埋單。唔講唔知，工務小組今個會期原訂審議七十二個項目，至今只係通過四項，搞到大塞車，政客為反對而反對，為拉布而拉布，你話係咪累人累物吖。

除咗港珠澳大橋，高鐵工程更加係財政黑洞。港府即將向立法會申請近二百億元追加撥款，高官出定口術，聲稱工程已經洗濕個頭，如果爛尾會造成數百億元損失，夠晒嚇人，但可唔可以令政客高抬貴手，一啲都唔樂觀。

所以話，今日香港無奇不有，政治議題固然紛紛擾擾，即使係版權條例修訂呢類民生議題，一樣搞到滿城風雨，議會內拉布流會，議會外暴力抗爭，甚至有人引爆垃圾桶添，問你怕未。

西諺講得啱：政客好似又髒又醜嘅尿布，必須定期更換。香港究竟幾時至可以清理呢班尿布呢？叮！