政壇：「良」言暗批陳文敏 教院正名搞亂檔
日前香港大學前法律學院院長陳文敏建議香港教育學院喺升格大學時，趁機提出修改教育學院條例，同時立法會議員毋須特首批准下，可以提出修訂取消特首成為院校當然校監，一旦成功通過，除咗可以成為先例，仲可以畀壓力其他院校進行修例。教院日前接受傳媒查詢時引述教院校長張仁良話，大學管治係嚴肅課題，仲認為現階段唔適宜節外生枝，以免影響教院正名進度。暗示叫陳文敏唔好多管閒事，咪將教院正名問題政治化、壞大事。
張仁良
其實張仁良憂慮都好正常，事關教院第一次申請正名已經係○七年嘅事，但○九年就被大學教育資助委員會否決，之後爭取到前教院校長張炳良卸任都未搞掂。直到去年，教院再次遞交正名大學申請，終於到今年先獲教資會通過正名報告。依家教院只係差行政會議通過同立法會修例就可以正式正名大學。教院依家埋門差一腳入波，陳文敏竟提出個咁有爭議性嘅建議，分分鐘壞大事，難怪有教育界人士批評此舉係想教院做炮灰喇！
