工展會開鑼，市民掃平貨外，唔少高官都有捧場，公務員事務局局長Clement張雲正同新聞秘書Teresa趙慧儀尋日都喺賣健康產品攤位內仔細研究，食物及衞生局署理局長陳肇始同常秘謝凌潔貞就一支箭咁走去睇廚具，商務及經濟發展局局長蘇錦樑都好快趣買咗個首飾盒，話要送畀太太，又買咗即食麵同蝦子麵，話佢好鍾意食喎。

張雲正（右）落力同趙慧儀（右三）推銷，右二為家得路執董陳家偉。

蘇錦樑（右）展示所買嘅首飾盒，廠商會副會長陳淑玲都感好奇。

Clement透露有家族遺傳血管硬化而導致血壓高，平時都有做運動，為預防做運動時血管過度擴張，佢會食健康產品，而且每次轉工都會因壓力而減磅，今次升任局長未夠半年已經瘦咗七磅喎！不過，經常需要食健康產品，佢都累積咗唔少心得，仲好熟練咁幫Teresa介紹各類產品。

第一手消息請下載on.cc東網iPhone/iPad/Android/Windows Phone Apps