政壇：搞搞政：「法律界桂綸鎂」 傳出山救新民黨
新民黨同沙田地區政團公民力量結盟後，喺區議會選舉失利，公民力量多名資深區議員全數落敗，令新界東「樁腳」銳減，不過，新民黨仍密謀派人出戰新界東，期望喺現有香港島同新界西議席上再添一席，有傳該黨使出秘密武器，或派出有「法律界桂綸鎂」之稱嘅大律師容海恩（Eunice）出戰新界東，實行食住靚女參政熱潮，不過，有指葉劉雖想扭盡六壬，但新界之戰仍有唔少挑戰。
Eunice早前成立一個青年專業人士組織，已經邀請葉劉出席；而佢喺區選期間，都有出席新民黨同公民力量的造勢大會，且葉劉多次與紀律部隊人士食飯，以及新民黨活動，不時都見到Eunice身影，連葉劉喺社交網站都有貼出佢哋嘅合照，相信係有意介紹呢位疑似立法會參選人予各界認識。不過，新民黨喺新東損兵折將，Eunice雖有「桂綸鎂」嘅美名，但知名度唔算高，想有零的突破，真係一場硬仗。
至於新界西方面，該黨贏多幾個區議員，估計立法會選舉將會繼續由副主席田北辰出戰，問題不大。但該黨喺香港島嘅選情或存在暗湧，雖然依舊由葉劉擔大旗出戰，但該黨亦痛失多個港島中產區「樁腳」，加上政界盛傳自由黨田北俊可能會轉戰香港島，肯定會界走一大堆中產票，對同樣主打中產嘅葉劉最不利。
