立法會帳目委員會尋日就早前嘅審計報告中，涉及廚餘減量同循環再造章節召開聆訊，議員狠批環境局處理廚餘失當，外號「星星」嘅環境局局長黃錦星辯稱，廚餘嘅增加同本地生產總值（GDP）及旅客增加有關，圖卸膊賴經濟，照佢咁講，係咪經濟轉差時廚餘問題就可以解決呢？咁佢又點睇南韓經濟起飛，但廚餘量卻顯著減少呢？或者答案係人哋嘅高官唔會懶懶閒，一味堆砌藉口囉。

睇番本港嘅廚餘量就知問題嚴重，以○四至一三年為例，香港廚餘總量不跌反升，上升達一成三。尋日立法會議員紛紛追問呢個問題，又批評當局無做到源頭減廢，講環保就得把口，點知星星回應時扯得好遠，佢話由於本地GDP同埋訪港旅客數字上升，加重咗工商界產生廚餘壓力，即係遊客同港人要孭飛！此言一出，議員梗係群起批評。

南韓取經學唔到嘢

其實官員亂噏當秘笈真係要戒，以廚餘嘅增加為例，同地區嘅飲食文化及環保態度好有關，好似近年南韓經濟大好，啲廚餘量都增加唔少，但當地政府適時推出按重量徵費嘅減廢政策，目標係減少四成廚餘量，結果成效顯著。唔通南韓依家嘅情況，係用攞GDP暴跌換嚟嘅咩？

早前食物環境衞生署懶理轄下街市成浪費食物重災區，已被批評政府無帶頭減廢，部門間欠配合。今次問責局長仲賴GDP同旅客，可見政府上下根本冇完整嘅處理廚餘思維同政策。與其搵藉口，不如學吓嘢喇，話時話，政府同立法會都有唔同代表團去過南韓取經，公帑就使咗，啲官員學到咩呢？

第一手消息請下載on.cc東網iPhone/iPad/Android/Windows Phone Apps