古詩有云，雲想衣裳花想容。愛美係人之常情，尤其女士更想有沉魚落雁之容，閉月羞花之貌。於是乎，整形及美容漸漸成為風氣，有啲美容針聲稱只要透過簡單注射，就可達到瘦面美白等效果，令唔少女士趨之若鶩。

係人都知，近年內地整形市場急速發展，美容針嘅需求愈來愈龐大，可惜由於監管漏洞多多，導致亂象叢生。呢嗱，深圳海關早前搗破一個走私玻尿酸、美白針等高檔美容針嘅網絡，涉案疑犯多達二十幾人，包括六名港人，懷疑長期組織水貨客從本港將美容針帶往內地，涉款達一點五億元人民幣，成為全國最大嘅走私美容針案件，都咪話唔誇張。

正如業內人士話齋，目前深圳大約有十家正規整形醫院，而非法提供美容針注射嘅診所及美容院更加不計其數。雖然內地有國產及進口美容針，但價格普遍比本港昂貴，加上要獲得授權喺指定地點採購，唔少診所及美容院轉而從黑市入貨，造就走私貨有價有市，當中夾雜唔少假貨。

唔使問阿貴，假貨來歷不明，成分複雜，係人都知靠唔住。最可怕嘅係，即使係正貨，質素亦未必有保證。好似肉毒桿菌美容針咁吖，運送過程需要冷藏儲存，但好多走私客只係求其將針劑放喺貨車或行李箱，根本冇冷藏設備，搞到藥物變質甚至產生有毒物質，你話嘞，注射呢啲美容針會有乜後果吖。

唔係嚇你㗎，近年美容變毀容嘅例子屢見不鮮，早已唔係新聞。嗱，內地有位女士為咗整高個鼻，貪平以一千元人民幣買咗幾支美容針自行注射，結果唔止下巴出現一個腫塊，更成為一搓就變形嘅「泥膠鼻」，搞到要開刀執手尾，真係喊得一句句。

咁都未算恐怖吖，美容變毀容仲係小事，分分鐘搞出人命先至大鑊。本港幾年前亦曾發生奪命美容毒血針事件，至今令人猶有餘悸，當局事後話就話檢討補鑊，點知結果只係發出一份冇法律約束力嘅所謂指引，問你服未。

講到底，求人不如求己。近年醫學美容問題多多，七國咁亂，當局固然要加強監管，唔好又係見到棺材至識流淚，而消費者亦要打醒十二分精神，千祈唔好愛靚唔愛命吖。正所謂，美麗誠可貴，生命價更高，亂打美容針等於搵命博，有乜冬瓜豆腐，受害嘅只係自己咋，叮！