城中鏡：陳嘉容揀model 要靚兼百變
名模Eunis陳嘉容尋日以評判身份出席大專院校嘅模特兒招生及即場面試，佢話希望可為模界發掘明日之星：「無論係行catwalk、影硬照都好，都想發掘一啲新男、女面孔，我嘅條件總之要有個人風格，模特兒唔係只要靚仔靚女，仲要有百變形象，可塑性高，夠高嘅可以行catwalk，唔夠嘅可以做平面model。」
陳嘉容話希望發掘到多啲有潛質嘅人做模特兒。
佢話今次重返校園，冇想起讀書時光，只憶及剛成為模特兒嘅階段：「諗起以前上堂學做model，覺得依家好幸福，以前我得十二堂上，依家佢哋有九十小時學晒化妝整頭、擺甫士、儀態等等，真係幸福好多，我嗰陣要自己慢慢經歷，自己學。曾經試過喺台上甩鞋，真係好尷尬，自己又好新唔識執生，之後掉低咗隻鞋入番後台，入到去啲前輩就同我講應該係返轉頭時執番起，再行番入後台，咁就好瀟灑，但我嗰陣只係識驚。」
咁依家冇乜model可以接棒？佢話：「所以我喺呢度發掘新嘅男女model。」佢又話自己唔考慮開模特兒公司，只享受教人嘅過程，但亦有考慮成為經理人：「我有諗過，未來有機會會考慮，但要搵到好有潛能嘅人先，一係唔做，一係做到最好。」
