城中鏡：知足常樂
基督教聯合醫務協會（協會）早前舉辦「華彩耀聯合慈善晚宴」，為聯合醫院擴建項目籌募經費，當晚衣香鬢影，太子珠寶鐘錶主席Jimmy鄧鉅明同太太鄧宣宏雁都拍拖出席。當晚Jimmy捐出靚錶拍賣籌款之餘，仲笑笑口話，要搵聯合醫院醫吓佢個心，事關近期佢嘅心靈受到少少創傷喎。
鄧鉅明（右）同太太鄧宣宏雁捐贈靚錶拍賣，以行動支持聯合醫院擴建。
右起：梁黃婉玲、徐德義同聯合醫院高級行政經理張玉清希望善款愈多愈好。
李淑媛（右）嘅漢服扮相夠晒出位，何榮添都好欣賞。
乜嘢事咁嚴重？Jimmy話因為生意唔好，導致佢有心病囉，不過，心病還需心藥醫，所以佢會積極啲諗，至少入行三十幾年來，已經歷過行業嘅黃金期，自己亦有啲積蓄，故此要知足喎。佢仲一邊講一邊笑，就知佢係搞笑嘞！
聯合醫院行政總監兼九龍東醫院聯網總監徐德義、協會籌款委員會主席梁黃婉玲一早到場招呼賓客。梁太話聯合醫院正進行擴建工程，雖然政府有撥款，但協會作為醫院嘅母會，亦需承擔部分經費，所以希望藉今次籌款活動籌集多啲善款。
李淑媛貴妃look成焦點
轉頭見到博愛醫院前主席何榮添同總理Sophia李淑媛，Sophia着住飄逸嘅漢服，仲戴住金色流蘇頭飾，成個貴妃出巡咁款，一入場即成為眾人爭相合影嘅焦點，唔知扮緊邊位娘娘呢？
Sophia笑笑口話唔知，因為當晚嘅衣着規定係華服，所以佢同男拍檔原本決定齊齊着古裝，點知對方突然甩底，令佢好尷尬。查實又唔使介懷嘅，當晚Sophia勁受歡迎，令派對增添唔少歡樂，都係件好事吖！城中姊妹如果唔想成日着旗袍咁悶，不妨學吓Sophia搞搞新意思。
