政壇：走火警懶懶閒 議員唔識死
呢頭《2014年版權（修訂）條例草案》未審議就流會，嗰頭立法會示威區垃圾桶又爆炸，真係要提防吓，咁啱立法會尋日舉行定期火警演習，可惜建制、泛民議員都懶懶閒、慢慢行，最後得十個議員成功「逃生」，日前首次點人數即促成流會嘅陳家洛都忍唔住再要求主席曾鈺成戶外點人數。
曾鈺成（右一）對走火警「流會」冇黑面。
立會大樓火警鐘一響，最先抵達添馬公園集合點嘅有曾鈺成同陳偉業，其後陳家洛等人陸續抵達。可能周三流會後，尋日朝早唔使續會，又未夠鐘開財委會，所以大樓入面冇乜議員，平日開會成日要求點人數「拉布」嘅陳偉業亦開玩笑話唔夠法定人數，要求曾鈺成宣布火警演習「無效」，再走多次火警。曾鈺成對今次「流會」冇黑面，笑騎騎話有幾十人失咗蹤喎。
演習總共用咗十分鐘三十秒，有五百三十三人到集合點。葉國謙遲大到，喺議員當中排包尾，唔驚走遲一步「葬身火海」咩？佢解釋話演習啫，冇咁大心理壓力喎，真係唔識死。
