政壇：雅虎女強人 生孖女沖喜

現年四十歲嘅邁耶絕對係高齡產婦，諗起佢近排畀維權股東狙擊，要召開董事會商討阿里股份單嘢，事前日以繼夜準備，孖女出世前一日公布分拆計劃告吹又要應付傳媒，全程大住個肚，真係強呀！

消息就話呢位女強人生完之後會請假兩個禮拜，遠遠少過自己定落嚟員工最多可享十六星期有薪產假。以為佢呢段時間乜都唔使理？Certainly not！嚴格嚟講邁耶只係暫時在家工作，兩個禮拜後重返雅虎總部咁解咋。

連埋三年前出世嘅大仔，邁耶依家係三位小朋友嘅媽媽，雖然雅虎互聯網業務喺佢上任以嚟無乜起色，期間不停有高層離巢，剝離阿里持股嘅大計橫生枝節，幸好日前董事會開腔支持以邁耶為首嘅現任管理層，主席韋伯（Maynard Webb）話從來未見過有咁搏殺嘅團隊。