政壇：搞搞政：工黨老鬼戀席 後生淪為炮灰

工黨喺聽日舉行會員大會改選領導層，李卓人率先表態唔會競逐連任主席，改與何秀蘭、張超雄擔任執委，準備交棒畀黨內新生代。雖然佢哋口口聲聲退下火線，但當問到係咪一併將立會議席交棒，佢哋又即刻轉口風。其中何秀蘭話議員要有系統交棒，新人做咗黨領導層先，將來接任都容易啲，工黨內部亦歡迎呢個做法。嘩，原來做咗黨主席先可以做議員，真係聞所未聞。

九東九西出名難打

何秀蘭又話現時該黨只有香港島、新界東同新界西三區議席，分別係佢、張超雄同李卓人，該黨喺九龍東同九龍西未有議席，所以仲有空間發展；而立會選舉係以泛民取得最多議席為目標，佢哋係咪參與有待黨員大會決定。

李卓人就話當然希望明年派多啲人參選，但前提是要力保泛民三分一議席。現時新西已經有一席，而新東又滿額，唯一希望可以喺九西增加一席。

會唔會派剛喺區選勝出嘅副主席譚駿賢參選「超級區議會」？李卓人指該黨冇十五名區議員，所以有困難。綜合兩人嘅說法，即係只剩下九東同九西可派人參選，但呢兩區出名難打，尤其係九西將會增加一席，令到競爭更為激烈，無疑推黨員去做炮灰。

其實如果工黨三名立會議員有心交棒畀新人參選，唔係佢哋口中咁困難，除非三人戀棧議席。例如派該黨首位區議員郭永健或擊敗建仔葛珮帆嘅葉榮排首位，拍張超雄出選新界東；譚駿賢就排首位拍李卓人出選新界西，而香港島就交由剛喺東區西灣河選區當選嘅麥德正拍何秀蘭出戰。