政壇：大舊拉布自作自受
話說立法會發展事務委員計劃喺明年三月去新加坡，內務委員會尋日就開會討論有關外訪，人民力量議員「大舊」陳偉業就要求內委會主席Andrew梁君彥同各委員會主席達成「君子協議」，喺議員外訪期間唔好加會。建仔議員Ann蔣麗芸批評大舊唔畀加會係不負責任，結果反被大舊寸番轉頭，質疑佢外訪當旅行，習慣公私不分。其實如果班議員唔係成日嘥時間互寸同「拉布」，咪唔使成日加會囉！
發展事務委員會計劃明年三月二十至二十三日去新加坡，考察當地開拓供水來源、發展海水化淡等經驗，暫時有八位議員參加。大舊尋日喺內會上話自己都好想去，但報名與否要視乎立法會加唔加會，因為現時財務委員會同工務小組委員會都成日加會，如果報咗名加會就好麻煩。所以佢就話要「先小人後君子」，要Andrew同啲委員會主席先作「君子協議」，如果議員外訪就唔可以加會。
阿Ann斥不負責任
阿Ann就即刻出聲，話唔能夠因為議員自己旅行、考察、放假就唔准加會，仲叫大舊呢啲不負責任嘅說話應三思後再講。大舊隨即反駁︰「可能有啲議員唔知咩叫公務，咩叫私利，習慣以公權謀私利，公私不分！」暗批阿Ann平時外訪當旅行。大舊講到自己好想去外訪，但又怕加會，其實如果唔係佢成日拉布，令大量議程積壓，又何需經常加會呢？唔知呢啲係咪自作自受呢？
另外，立法會議員「田少」田北俊都話有意去新加坡外訪，但因為已經截止報名，如果想去係咪太遲？定係啲錢會唔夠使？一眾議員聽到田少話唔夠錢使，即時乘機起哄，議員鍾樹根仲話︰「你（田少）點會唔夠錢，咁講即係挖苦我哋啫！」
