公屋三年上樓係港府嘅承諾，可惜早就淪為空頭支票，根據房屋署嘅最新講法，平均輪候時間延長至三點六年喎。不過咁，官僚靠得住，豬乸會上樹，如果你真係相信，就太傻太天真嘞。

申訴專員公署發表最新一期報告，踢爆房屋署嘅平均公屋輪候時間計法籠統，將「一般申請者」同長者及凶宅等優先及特快配屋類別混合計算，誤導公眾。如果只計算一般申請類別，截至去年六月底，五成二申請人輪候超過三年，兩成七超過四年，部分人更超過五年，最長甚至達到七年添，即係話，所謂嘅三年上樓完全係假象咋！

申訴署又批評，房署無為第二次及第三次有效編配訂下輪候時間指標。有個案雖然喺三年配屋指標內獲首次編配，但申請人拒絕後，輪候多兩年五個月仍未獲第二次編配。

老實講，房署刻意誤導公眾，製造三年上樓假象，一啲都唔出奇。係人都知，公屋供應嚴重短缺，無殼蝸牛望樓興嘆，官僚無計可施，惟有靠篤數掩人耳目。房署以「資訊未必對市民有用」為由，唔肯向市民發放預計單位供應量及第二、三次編配輪候時間等資訊，真正原因唔係對市民無用，而係對當局不利。公屋輪候冊人數早就突破二十八萬，唔使幾耐就會衝破三十萬大關，但係港府建屋依然慢過龜爬，如果公開數據，隨時將無殼蝸牛逼上街嘅咋。

唔係講笑o架，房屋問題積重難返，輪候公屋簡直就係一次徬徨無助嘅痛苦經歷。呢，有人一家四口申請公屋，苦等八年依然未能上樓，結果頂唔順，被迫改為申請三人較細單位。另外有個租住深水埗三百呎私人單位嘅四口之家，申請公屋五年仍然無消息，男戶主以為自己年逾六十，可獲優先編配單位喇，點知現時仲有七萬幾個輪候號碼排喺前面，問你服未。

係人都知，只有大量增加公屋供應，至可以縮短輪候時間，可惜港府拓地建屋阻力重重，處處碰壁，除咗篤數敷衍民意之外，根本束手無策。唔係嚇你，隨住房屋問題不斷惡化，申請公屋人數有增無減，輪候時間仲會進一步延長，隨時等到天荒地老都似！

話時話，港府聲稱十年內興建二十九萬個公營房屋單位，申訴署不妨順便調查一下，話唔定可以踢爆另一個篤數假象o架，叮！