城中鏡：情迷琥珀
話說琥珀思雅及國際琥珀協會早前舉辦「波羅的海琥珀節2015」，鍾情琥珀嘅珠寶設計師羅啟妍都有出席湊熱鬧，佢話每粒琥珀都有其獨特顏色、形狀同香味，亦因為琥珀同佛教有關，所以深受唔少亞洲地區人士歡迎。當日見佢除咗頸上戴上琥珀頸鏈之外，手上仲戴上大大粒嘅琥珀戒指，連波蘭駐港領事都讚隻戒指好靚，但佢就細細聲話隻戒指係塑膠造嘅，原來背後有苦衷。
羅啟妍戴住大大粒嘅琥珀戒指，原來係塑膠造嘅。
蔡毅明（左）設計嘅旗袍同崔亮欣嘅琥珀非常相襯。
李惠玲當日穿着嘅旗袍由自己一手縫製。
羅啟妍話由於琥珀質地比較脆弱，如果成隻戒指連指環部分都係全琥珀嘅話，就會好容易斷開，佢原本嗰隻琥珀戒指就戴到出現一條裂紋，擔心再繼續戴落去會斷裂，所以就留番喺屋企珍藏，出街就戴隻塑膠造嘅。至於條琥珀頸鏈，因為冇咁易撞到，所以當日佢戴嗰條琥珀頸鏈係真。
蔡毅明設計現代化旗袍
當日琥珀節，大會安排咗琥珀珠寶時裝表演，以充滿東方色彩味道嘅旗袍配襯琥珀。本身係模特兒嘅旗袍品牌Yi-ming創辦人兼設計師蔡毅明就話，以前同外國模特兒出席活動時，會間中穿着旗袍，其他人一見到，就分辨到佢來自乜嘢國家，而為咗想旗袍睇落有現代感，佢會喺設計加入「方便」嘅元素，例如選用拉鏈而捨棄一排式嘅斜身鈕扣，至於用料、顏色同圖案亦與傳統旗袍有別。
同場仲有珠寶品牌琥珀思雅創辦人Nancy崔亮欣、香港歷史博物館及香港文化博物館特約研究員及編輯李惠玲。Nancy話現實中嘅琥珀間中會有昆蟲被包裹喺中間，但唔會好似恐龍電影情節咁，隔咗咁多年仲喺琥珀入面隻蚊度驗到其他動物嘅DNA喎。
