政壇：兜巴星：減廢錯數玩卸膊 星星塞責嘥公帑

最新一份審計報告揭露環境局多年嚟都「計錯數」，導致都市固體廢物量同回收率被扭曲。立法會政府帳目委員會早前召開聆訊，多名委員批評環境局同海關欠協調，導致多年收集嘅數據出錯，枉花公帑，就連三個堆填區飽和時間都有高估之嫌，變相為堆填區減壽，又擔心當局獲得擴建堆填區撥款後歎慢板，輕視源頭減廢。兩個部門就死撐話「計錯數」全因回收商同貿易商對本港產品出口貨嘅定義有誤解，當局已加強教育。環境局局長「星星」黃錦星冇做好本分，淨係識推卸責任畀其他人；如果再唔認真處理問題，遲早畀市民當係垃圾，兜落堆填區！