Beyond嘅經典名曲《海闊天空》陪伴唔少人成長，但中華廠商聯合會會長Eddy李秀恒尋日出席廠商會獎學金頒獎禮時自爆，聽到呢首歌，都唔知叫乜名喎！Eddy話之前佢個女港大社會科學碩士畢業，佢參加畢業禮時，見到一班畢業生好興奮咁一邊揮住頂帽，一邊唱「原諒我這一生不羈放縱愛自由…… 」，覺得場面好感動，但就唔知呢首歌叫乜名。

李秀恒事後先至搵番首歌叫乜名。

Eddy解釋，雖然經常聽到呢首歌，但Beyond唔係佢讀書嗰個年代，加上啲歌難度好高，所以都好少唱，但之後都有特別去搵番首歌叫乜名。問佢呢首歌喺佔領行動期間，經常有人唱喎，Eddy就覺得唱呢首歌未必等如佔領行動嘅，班畢業生當日都好守秩序，覺得佢哋唱呢首歌，可能係想表達自己未來都海闊天空啫！

第一手消息請下載on.cc東網iPhone/iPad/Android/Windows Phone Apps