政壇：搞搞政：陳文敏改姓「賴」 佔中唔關佢事

陳文敏尋日出席人權新聞獎活動時主動談到佔中，但冇提及自己縱容下屬收取捐款、發動佔中一事，只重申自己喺佔中期間唔喺香港，講到佔中期間發生嘅事都同佢無關。佢又話作為院長嘅責任只係處理行政同教職員工作，佢管唔到學生課外時間做乜嘢。既然作為院長要管理教職員，點解佢冇管好教職員戴耀廷，任由戴發動佔中？兼夾批准戴收取匿名捐款喺校內搞政治活動？

促取消特首任院校校監

提到近日港大校委會同副校長人選風波，陳文敏指回歸之後出現咗幾宗干涉學術自由的事件，都顯示由特首出任大學校監嘅制度有問題，建議藉教育學院升格大學一併作出改變。佢建議，教育學院升格大學時要修改教育學院條例，因為唔涉及開支，到時修例毋須特首批准，立法會議員就可以提出取消特首成為院校當然校監，可以成為先例畀壓力其他院校作出改變。

佢又批評，被傳接任港大校委會主席嘅前教統局局長李國章係一個會引起撕裂嘅人，質疑任命並非為大學利益。佢咁講，莫非因李國章早前質疑佢冇博士學位，並指政黨支持佢做港大副校長，係想喺港大安插「黨委書記」，兼且最終未能當上港大副校長，因而老羞成怒？

本港多間大學的國際排名近年不斷下跌，有人就認為係同唔少大學師生終日掛住搞政治、搞對抗有關。尋日亦有台下嘉賓提及大學排名下跌問題，陳文敏推說唔同機構嘅排名準則經常會變，死撐相對於學生參與社會運動，港大副校長風波等政治干預對大學影響更大喎，真係乜都畀佢講晒。