政壇：謝偉銓叫阿女咪買樓
身為測量師嘅立法會建築、測量及都市規劃界議員Tony謝偉銓，從事地產業務三十幾年，相信對樓市有獨特嘅睇法。話說Tony女兒將喺下月結婚，早前忙於張羅新居，Tony就建議女兒暫時唔好買樓，莫非連佢都睇淡樓市，諗住遲買平一截？大家唔好誤會，其實Tony只係擔心女兒唔能夠同時兼顧結婚同買樓兩件人生大事啫！
謝偉銓（中）下月嫁女（右），佢同太太嘅心情都好緊張。 （資料圖片）
Tony話女兒當年係拔尖嘅，已獲香港大學錄取，但女兒當時決意要到英國留學，而佢亦曾陪女兒到英國嘅校舍實地視察環境，佢話嗰間大學都好出名，校園仲好大，佢笑言當時又職業病發作，仲周圍睇下校舍啲建築係點嘅添！本來諗住女兒會喺英國讀幾年，修畢整個課程，點知佢讀咗一年到，太太又掛住個女，太太同個女傾咗一輪之後，個女應承返港，之後港大又錄取番佢添！
笑稱限制感言時間
對於女兒快將出嫁，Tony坦言太太心情好糾結，而佢亦非常着緊，好似女兒婚後要另覓居所，佢都有幫眼睇租約條款。唔知係咪擔心大家於婚禮當日太多感言，Tony講笑話可以學吓立法會咁，限制每人只可發言數分鐘喎。
Tony其後又分享租樓嘅學問，透露最好揀定兩至三個區，否則地產代理提供嘅選擇太多，就容易花多眼亂，另外亦要對租金有預算，如果遇上心儀租盤，即使畀多一、兩千元亦在所不惜。佢又話，即使順利簽租約，都要檢查吓家具有無損壞，如果提早搬入新居，都要喺合約上寫清楚，保障自己。為人父母，真係「養兒一百歲，長憂九十九」。
