政壇：肥張報案撇甩記者

金融服務界立法會議員「肥張」張華峰日前自爆捲入騙案，被假扮做全國政協委員黃楚標嘅騙徒呃咗九萬元，事件揚開之後，肥張原本話前日朝早會到警署報案，但又臨時甩底，咁佢到底報案未呢？

尋日中午，肥張喺社交網站留言話：「多謝傳媒朋友關心本人的遭遇，但我不想大家就此再胡亂揣測。作為一位奉公守法的巿民，我昨（8日）已跟警方落了口供，相信警方會努力跟進案件，查個水落石出，把歹徒繩之於法。」原來肥張已經拿拿聲報咗警、落埋口供添，但佢之前又透露幾時去報案，講咗又唔現身，累傳媒白等數小時就唔好喇。

肥張出到調虎離山之計，自己低調去咗第二個警署報案，都係唔想再成全城焦點，但掉轉頭諗，佢呢件事對城中唔少富商、名人，甚至一般市民都有警示作用，大家知多啲，騙案都少啲。