一年已近尾聲,又係時候反思己過,好多人都話年輕人容易犯錯,綜合成功企業家、財經界、心理學家、著名作家、投資專家等嘅心得,佢哋總結咗二十幾歲容易犯嘅十五項錯誤,包括自覺教育程度足夠、冇儲蓄習慣致周身債、冇耐性、困死喺「非黑即白」嘅觀念等,已經三字頭嘅華融國際聯席董事李偉傑(Jason)就話,十五項錯誤中,佢中咗五項,而最後悔嘅就係「忽略健康」。

李偉傑

Jason話:「當年二十幾歲仔,以為自己quota夠多,鍾意食啲咩就食咩,成日去食自助餐,仲要食到120%飽,自己又特別鍾意飲酒同食海鮮,魚蝦蟹樣樣都好。」結果,惡果依家出現,有啲肥、有少少士啤呔嘅佢,三字頭已經有三高,即是「高血壓、高尿酸、高膽固醇」,肇因可能係以前暴飲暴食,依家惟有亡羊補牢,佢一至兩個禮拜就會去打次羽毛球,仲要盡量戒口少食海鮮,少啲飲酒。

至於佢犯嘅年輕錯誤就有「冇耐性」、「期望友誼直到永遠」、「期望搵到個情人知己」、「畀其他人定義自己」。其他錯誤則有一唔如意即刻放棄、諗得太遠、目標多多、自以為是、目空一切等。

第一手消息請下載on.cc東網iPhone/iPad/Android/Windows Phone Apps