政壇：蔡冠深幫徐立之 「灌水」港科院
近期香港突然好「科技」，繼創新及科技局成立之後，由香港大學前校長徐立之做創院院長嘅港科院亦隨之成立，霎時間，一直喺實驗室埋首做研究嘅科學家，似乎備受各界重視。不過，政府只係採取配對基金形式支持港科院，若想有充足水源畀科學家安心做研究，仍需企業家泵水支持至得，而搵「水源」嘅重任就落在徐立之身上。
徐立之（右）揼蔡冠深心口捐錢支持港科院，蔡冠深爽快應承。（受訪者提供）
徐立之近日就成功搵到中華總商會永遠名譽會長蔡冠深（Jonathan）捐助一千萬元，支持港科院。Jonathan話，佢擔任中國科學院顧問已二十幾年，一直好支持科技，所以當徐立之搵佢幫手時，佢即爽快應承，並出任港科院創會贊助人兼院長高級顧問。港科院成立當日，與港科院對口嘅中科院院長白春禮亦有出席。
外界經常話香港欠缺創新人才，Jonathan話未必係咁，因為香港仍有唔少土生土長、講廣東話嘅科學家，佢希望港科院成立後，可以做多啲貼近社會嘅科研活動，以提升年輕人對科技嘅興趣。
