政壇：陳奕朗 陳奕茹 打家族工冇假放
好多打工仔都有句口頭禪，「幾時可以打自己工就好喇」，不過，真正打家族工嘅城中豪門二代就唔係咁睇，譬如現代牙科副主席陳冠斌嘅一對子女，同樣任公司執董嘅陳奕朗（Ronald）同營銷總監陳奕茹（Edith）就話，打自己工仲忙，好似呢個聖誕，佢哋都要工作，諗都冇諗過去邊度玩。
現代牙科二代陳奕朗（左）同阿妹陳奕茹忙於公司上市事宜，同聖誕樹影相已經算節日應景咯！
Edith解釋，正因為喺自己公司做嘢，要更加睇緊啲，連放假都唔敢。講到佢哋公司有兩大股東陣營，分別係陳姓同魏姓，會唔會公司管理更難呢？Edith話，大家都係成年人，做嘅嘢都係為公司好，而且，當年父輩們係世交，所以先會一齊搞公司。
