政壇：搞搞政：敗選唔翻兜 阿基焗搬竇
民協立法會議員馮檢基（阿基）上月在深水埗區議會選舉落敗，區議員生涯止步，更喪失立法會超級議席入場券，依家更連明年嘅立法會選舉都受影響，據知，經協調後，該黨鐵定派副主席譚國僑出戰九龍西，而阿基焗住要搬竇往九龍東或新界西，據講，新界西機會最大喎。
插旗九東或新界西機會高
阿基早於區選前表明，倘若敗選唔會「翻兜」九龍西，咁揀邊區出選好呢？新界東亦因為泛民黨派競爭太激烈，加上民協在新界東缺乏地區樁腳，相信針都插不入，餘下只有九龍東以及新界西，九龍東與阿基的「老巢」九龍西一樣，都是公屋集中嘅選區，阿基早年亦關注牛頭角公屋重建工程，可惜民協係「深水埗黨」，缺乏其他區嘅地區樁腳。
反而喺新界西會較多機會，一方面係白鴿黨選情失利，上月區選在新西失咗四席，反而民協喺屯門區議會仲有碩果僅存嘅三席，阿基或者可以「食老本」靠呢批樁腳，趁勢界走白鴿黨嘅選票。如果係咁嘅話，阿基喺新界西分分鐘要正面對撼陳樹英、尹兆堅等，一場窩裏鬥睇嚟又少不免。
