立法會尋日召開大會，除咗最後流會之外，都發生咗單疑似爆粗事件，呢件事同身兼行政會議成員、香港總商會代表及經民聯副主席嘅商界（一）議員林健鋒（Jeffrey）有關。商人形象深入民心嘅Jeffrey尋日因為發言被截，據指未及關閉議員發言用嘅咪高峰，已經講咗「冚家」兩字出街，被佢噴嘅人就係人民力量嘅慢必陳志全。

尋日中午，立法會復會後，議事廳人員就開始少，當時大會正在處理議員提出嘅六條口頭質詢，當立法會主席曾鈺成點Jeffrey個名，到佢提出跟進問題時，Jeffrey隨即將收音咪掛在心口，準備企起身發言，點知，「慢必」陳志全即刻搶閘，要求響鐘點算法定人數，Jeffrey當堂被人打窒咗。被截住發言嘅Jeffrey一邊用手將咪脫下，一邊疑似講了「冚家」兩個字，估計係佢一時氣憤衝口而出，但就甩轆唔記得熄咪，結果將心嗰句講咗出嚟。

近半時間響鐘 無名火起

雖然Jeffrey未必係有心公開爆粗，教壞細路，但佢咁火起，都同尋日會議嘅秩序有關。正如立會主席曾鈺成尋日都唔滿意兩個鐘嘅會議，用咗近半時間嚟響鐘、等議員到席一樣，原來尋日慢必開聲前，議會已經唔係第一次響鐘點人數，咁啱Jeffrey發言被截停，又要再聽冗長嘅鐘聲，因此即刻着火啩。Jeffrey尋晚回覆話：「人無完人，我都係性情中人」，即係間接承認有爆粗啦。

講開又講，立法會議事廳不時傳出有人爆粗事件，過去嘅常客有激進泛民嘅「拉布」四人組，仲有講過「肯X定有問題」嘅民建聯鍾樹根，今次再加個林健鋒，真係爆粗不分背景！

第一手消息請下載on.cc東網iPhone/iPad/Android/Windows Phone Apps