電騙黨肆虐香港，中港台三地警方月前展開跨國大追捕，赴印尼直搗匪巢，大舉拘捕數百名大陸和台灣騙徒，簡直大快人心。不過咁，百足之蟲，死而不僵，大家唔好以為電騙黨從此被一鋪打殘呀，呢嗱，話口未完又嚟一單嘞，今次唔止普通市民中招，連有名有姓嘅全國政協委員都一樣誤入電騙陷阱，問你怕未。

話說有一名全國政協委員懷疑手機被勾線，騙徒假扮當事人致電多個全國政協委員，訛稱喺內地出事需要一筆錢「營救」，結果有一名全國政協委員信以為真並匯款九萬元，及後向當事人查證至知道被呃，雖然話涉及嘅金額唔大，但騙徒竟然夠膽喺政協頭上動土，都咪話唔猖狂。

話時話，近年電話騙案肆虐已廣為報道，警方仲推出防騙廣告添，市民理應提高警覺喇，點解依然不斷有人落疊受騙呢？好簡單，道高一尺、魔高一丈，不法之徒手法日新月異，唔怕你精，唔怕你呆，最怕你唔接電話，唔少市民低估騙徒嘅技術水平，不虞有詐，好易吃虧在眼前嘅咋。

大家有眼見，以往騙徒一般只靠隨機致電或發短訊，依家進化到用網絡電話改號、盜取微信帳號到電話勾線，少啲科技知識都唔得。最犀利嘅係，今次騙徒唔止把聲神似，仲叫得出對方「暱稱」，顯然係做足功課，有備而來，受害人咪輕易上當囉。

仲有呀，騙徒唔止擅長科技，行騙手法亦與時並進，並會因應社會熱話推陳出新，好似話內地公布「二孩」政策冇耐，不法之徒已經食住條水，立即變招布下「退生育費」局呃錢，可見轉數之快，市民根本防不勝防。

唔係誇張㗎，電話騙案只係冰山一角，隨着現代科技進步，大規模嘅跨境犯罪將會愈來愈普遍，分工精密，層層管理，最難搞嘅係，不法之徒唔再局限於中港兩地，更涉及東南亞其他地區，如果冇各地執法機構配合，案件未必可以順利偵破。所以呢，港府有必要強化源頭治理，加強與海峽兩岸及國際執法機構合作，建立常態化情報交流及疑犯緝捕等工作機制，令跨國不法之徒如過街老鼠，自然無處可逃啦。

一句講晒，電騙黨唔係一次兩次大掃蕩就可以解決，市民固然要打醒十二分精神，執法部門亦唔可以掉以輕心，否則只會野火燒不盡，春風吹又生。叮！