城中鏡：葉劉另起「跑道」 為大學生鋪路
立法會議員葉劉淑儀早前成立海上絲綢之路協會，尋日又宣布協會下另設青年機遇委員會，計劃為本地大學生提供一百個實習機會，名正言順另起跑道幫學生前途鋪路。佢仲搵咗恒基地產副主席李家傑出任主席，又邀請「玩具大王」蔡志明兒子蔡加讚、近期同葉劉行得好埋嘅大律師、「香港青年專業網絡」主席容海恩等人任副主席。
葉劉淑儀（中）成立青年機遇委員會，為學生鋪路。左為陳智思，右為蔡加讚。
向世界出發實習
葉劉透露，委員會向世界各地搵咗唔少暑期實習機會，工作地點包括內地及多個國家，涵蓋旅遊、資訊科技、石油化工等行業，至今已經搵到七十個空缺，明年一月起接受報名。協會聯席主席之一、行政會議成員陳智思都出力支持，但佢旗下亞洲金融集團只係提供兩個暑期實習名額，到佢泰國嘅酒店項目實習，似乎少咗啲喎。
