城中鏡：樂助青年
青年工作唔一定係硬繃繃，可以充滿文化氣息，中華全國青年聯合會（全國青聯）一班歷屆港區委員日前成立一個新組織「香港全國青聯委員協進會」，並舉行就職禮，團結並加強新舊委員溝通，除咗由全國青聯副主席鄭志剛及施榮忻（Jaime）擔任聯席主席外，著名鋼琴家李雲迪都位列協進會副主席之一。
施榮忻（左）及吳傑莊（右）積極帶動青年工作。
協進會副主席李雲迪（右）同鄭志剛（左）密斟。
許華傑大讚與副學士學生合作有驚喜。
許華傑讚學生有諗頭
Jaime話，李雲迪加入係希望未來可以舉辦多啲同音樂有關嘅活動，令青年工作更多元化。協進會成立之後，新舊委員可以多啲聚首，目標一年舉辦二至四項活動。對於近期多咗年輕人從政，佢覺得係好事，認為年輕人從議會等正確途徑表達意見，比起在街頭佔領等方式更有效。至於新一代年輕人想上車買樓但無能力，佢勉勵毋須心急，可以做多幾年嘢儲吓錢。
同場仲有協進會副主席吳傑莊及顧問許華傑（Michael）。講起青年工作，Michael話近期同浸會大學一班副學士學生合作，原先係諗住畀個實習機會啲學生，點知卻有意外驚喜。佢話呢班副學士充滿熱情，其中部分組別幫佢公司諗到好多市場推廣嘅新橋。佢話，現時好多大學生畢業都放眼大公司，反而唔少副學士學生係中小企未來人才。
至於吳傑莊就話嚟緊一月會帶團同一班中學生以及大學生去哈爾濱睇冰雕展、與當地大學交流及參觀古蹟景點，佢仲話自己十幾年前都去過哈爾濱睇冰雕，五光十色非常靚，印象深刻。
