阿保一族：零廢露營
氣溫終於下降，驅使喜愛「人在野」的戶外活動愛好者，急不及待享受露營樂，但若不得其法，隨時令珍貴自然環境受到破壞。近年「不留痕迹」（Leave no trace）環保露營大行其道，有露營達人身體力行，呼籲露營人士「帶幾多嘢嚟、帶幾多嘢走」，透過自備露營用具、使用環保產品等，為保護大自然出一分力。文：李耀宗/圖：甘偉倫
露營達人Leo和Elaine呼籲露營人士「帶幾多嘢嚟、帶幾多嘢走」。
電油爐可減少消耗不可回收的石油氣罐。
多款可重用露營裝備。
營地垃圾桶內充滿膠樽、即棄餐具等垃圾。
營地不難發現露營人士使用即棄餐具。
不少戶外活動愛好者參與露營活動，遠離城市煩囂，分享熱愛大自然的生活態度，但當中有人因「貪方便」，購買大量用完即棄的塑膠用品，浪費之餘更製造大量垃圾，破壞自然環境。記者到上水鶴藪及流水響營地視察，發現營地垃圾桶內滿布膠樽、即棄餐具等，亦見有露營人士使用大量膠袋，攜帶一包二包上山。
「我哋都係環境嘅一分子，所有生物都有公平享受大自然嘅權利。」從事資訊科技行業的Leo和從事市場推廣的Elaine，兩人因為經常結伴露營，並且留意到有露營人士做「大嘥鬼」製造大量垃圾，遂於年多前設立了社交媒體專頁「極重豚」，推廣環保露營意念。
電油爐煮食無垃圾
「我哋嘅宗旨就係，『露』得開心之餘亦要『露』得環保，盡量達到零廢棄、零浪費。」Leo和Elaine 稱。
學習環保露營的第一步，就要從自備露營用具開始。「最緊要夠耐用同Multi-tasking（多用途）。」Leo表示，合適的裝備可提高露營樂趣，又可減少製造垃圾，「畀少少錢買套多用途餐具同鈦杯，已經夠我哋一世唔使再買即棄餐具！」
Elaine亦指出，不少露營人士愛用石油氣爐，消耗大量不可回收的石油氣罐，「用電油爐都係一樣，但唔會製造垃圾。」除自備露營用具外，使用環保產品亦是實現「零廢棄」的重要一環。
Leo指出，樽裝飲品是野外垃圾的一大來源，飲用濾水器過濾嘅河水、溪水等野外水源，可減少製造膠樽。
用茶包清潔少污染
另外，使用洗潔精等化學用品清潔露營用具，亦會造成水源污染，「帶多幾個茶包，既可以除油，又可以攞嚟飲，仲可以買少幾支樽裝飲品。」Elaine解釋，「只要花啲心思，就可以促進環保，何樂而不為？」
