政壇：天寶聘員工 成家人住埋
一家人會否喺一間公司做？聽落似乎好少，不過，以生產變壓器起家嘅天寶主席洪光椅就話，佢哋公司好鍾意成家咁請員工，喺內地嘅廠就有人三代同堂一齊幫佢打工，員工宿舍連家庭房同夫妻房都有得揀。咁嘅安排，其他內地廠好少見。
洪光椅（中）嘅內地廠房聘用咗唔少家庭式員工。
咁洪主席自己個家又點呢？佢嘅公子洪瑞德（Andrew）今年二十九歲嘞，係公司執董兼市場總監，原來兩父子仲係一齊住，雖然Andrew一早置咗業，但仍想同阿爸一齊住咁。唔講唔知，Andrew喺英國讀生物化學，同一般公司第二代通常修讀工商管理唔同，洪爸爸話自己好開通，任由阿仔鍾意讀乜就讀乜。洪主席仲有位千金，但未入公司幫手，佢喺香港嘅大學讀書。
